Малинин, Александр Васильевич

Александр Васильевич Малинин (9 Пеледыш 1941 ий, Морко кундемысе Кожлаер ял) — мурызо, Марий Эл Республикын кугыжаныш премийын лауреатше.

Александр Малинин
Александр Васильевич Малинин

Ӱмыргорно

1941 ийын Пеледыш тылзын 9-ше кечынже Морко кундемысе Кожлаер ялыште шочын. 1954 ийыште пеле кыдалаш школым тунем пытарымеке, колхозышто пашам ышташ тӱҥалеш. Тыге Эчан куд ий озанлыкыште тырша. Икана Йошкар-Ола гыч толшо музыкант-влак, Эчанын музыкылан шӱман улмыжым шижын, тудлан музыкальный училищыш тунемаш пураш ойым пуэныт. Нунын каҥашыштым колыштын, Эчан олашке толешат, музыкальный училищыш тромбоным шокташ тунемаш пура. Тудым пытарымеке, Марий кугыжаныш филармонийын оркестрышкыже толеш. Вара тудым хорын артистше-влак коклашке шогалтат.

Усталык паша

Тыгодымак мурышо да куштышо «Марий Эл» ансамбльын концертлаштыже марий калык семӱзгарым шокта. Баянын аккомпанироватлымыж почеш шӱвыр, шун шӱшпык, шиялтыш дене сылне семым луктын. 1972 ийыште Москосо Кремлевский дворецыште выступатлымыжым кугешнен ушештара. Тунам куд еҥан шӱвырзӧ-тӱмырзо ансамбль да тошто марий куштымашым ончыкташ Н.Дружинина ден А.Чеботкин миеныт улмаш.

- Мо кертмынам ончыкышна, марий искусство дене залысе уло калыкым палдарышна.

- шарналта Александр Малинин.

1973 ийыште «Марий Эл» кугыжаныш ансамбльын эн уста исполнительже семын республикын кугыжаныш премийжым сулен налеш, а 1978 ийыште Всероссийский конкурсын дипломантше лӱмым пуат. Тунам тудо шиялтышым йоҥгалтарен, а Иван Козырев баяным шоктен. 1983-1986 ийлаште Владислав Куприяновын вуйлатыме «Элнет» вокально-инструментальный ансамбльыште солист семын мурен да калык инструмент-влакым шоктен коштын. А вара уэш хоровой капеллыш кусна да пенсийыш лекмешке тушто мура. Марий АССР-ын Калык артистше лӱмым нумалеш.

Еш

Александр Васильевич Малинин пелашыж дене кум икшывым ончен куштеныт.