Википедий:Статьям лӱмдымаш

Кунам статьям у статьям тӱҥалыда – эн ончыч кычал ончалза – ала тыгай статья уло – да вес лӱм дене. Мутлан, Василий Васильевич Крылов да Шулдыр Васли лӱм-влак ик айдемым ончыктат. Тудын нерген статья стандарт почеш «Крылов, Василий Васильевич» лӱмдалтшаш. А моло лӱм-влак (Василий Крылов, Шулдыр Васли, Василий Васильевич Крылов, Крылов Василий Васильевич) лудшым «Крылов, Василий Васильевич» лаштык деке кондышаш улыт. Кузе тидым ышташ – ончалын кертыда.

Тӱн принцип тыгай: статьян лӱмжӧ айдемым эн чӱчкыдын лӱмдымӧ лӱм дене лӱмдалтшаш, но ты годым вес айдемын лӱмжӧ дене варалтшаш огыл.

1. Айдеме нерген статьян лӱмышкыжӧ ешартыш-влакым (Кугыжа, Шнуй, Мистер, айдеме) ида возо.
2. Эн чӱчкыдын статьян лӱмжӧ-влак кириллице дене возалтшаш улыт. («Messi, Lionel» огыл, а «Месси, Лионель»
3. Айдемын лӱмыштыжӧ аватмутым кучылташ ок лий.

Лӱм-влакым запятой гоч возымаш

Еҥ нерген статьям лӱмдымаш шотышто Марий Википедий Руш Википедийын корныж почеш кая.

• Тукымлӱм, Лӱм Ачалӱм – тиде формул почеш статья лӱмдалтшаш (мутлан, Абдулов, Александр Саликович).

Йотэлысе лӱм-влак

Тукымлӱм, Лӱм приставке (де, дю, д', фон, дер, ван, ди да моло). Мутлан, «Бальзак, Оноре де», «Бетховен, Людвиг ван») Приставке дене гына кучылтмо фамилийыште лиеш вес формул дене пайдаланаш – Тукымлӱм приставке дене, Лӱм. Мутлан, «Де Голль, Шарль», «Ван Бастен, Марко».

Икмутан лӱм

Аристотель, Платон, Плутарх, Евклид, Мухаммед, Фибоначчи лӱм-влак калыкыште ик мут дене веле шарленыт. Сандене, нунын нерген статья-влакым ик мут денак лӱмдена. Кызытсе жапыштат шукын икмутан лӱм дене палыме улыт: Ванга, Хирохито, Роналдиньо, Пеле, Земфира, Алсу. Кунам нине лӱм-влакышке эше тукымлӱмыштым ешарат гын – умылаш йӧсӧ - а тиде айдеме нергенак мо статьяже?

Организаций, ушем да т.м.

Организаций нерген статья кавычке деч посна лӱмдалтшаш. Тӱҥлан кавычкыште кучылтмо лӱм шотлалтеш, варажым скобкышто палемдымашым ешараш лиеш. Мутлан:

• Марий Эл (газет) (Йоҥлыш: «Марий Эл» газет)
• Марий Эл (Ий полат)