Викиувер:Марий йылмым да тӱвырам вияҥдаш йӧным ыштена
Республикысе марий тӱвыра рӱдер марий йылмым да тӱвырам аралыме да вияҥдыме сомыллан кугу тӱткышым ойыра. Тидым тудо ыштен шогымо пашаж дене ончыкта. Кызытсе пагытлан вич проект илышыш шыҥдаралтеш. Марий Эл Республикын Тӱвыра, печать да калык-влакын пашашт шотышто министерствын полышыжлан кӧра нуно шукталтыт.
Йылмым тунеммаште куштылгылыкым ышташ, тыгак марий сылнымутым калык коклаште шараш манын, тений гыч аудиокнига-влакым лукташ тӱҥалме. Таче кече марте 40 утла лудышым олыкмарла да курыкмарла аудиоформатыш пыштыме. Тиде жаплан Я. Майоров-Шкетанын, Сергей Чавайнын, Вячеслав Абукаев-Эмгакын, Иван Одарын, Маргарита Ушакован, Валентин Колумбын, Геннадий Матюковскийын возымо сылнымутыштым возымо. Нуным Шкетан лӱмеш Марий национальный театрын артистше-влак Светлана Строганова, Александр Бирюков, Алексей Юнусов лудыт. Марий Эл Республикын калык поэтше Геннадий Сабанцев Майоров-Шкетанын ойлымашыже-влакым кумылын ока.
Аудиокнигам возымо проектым рӱдерын пашаеҥже-влак Андрей Чемышев, Надежда Тимофеева илышыш шыҥдарат. Тыгак тиде сомылым кызыт Россий армийыште службым эртыше Вадим Протасов шке кумылын шукта.
Кодшо ийыште тӱҥалме «Марла ойлаш тунемына» мультурокым умбакыже луктына.
Тыгак тений марий йылмым тунемме видеоурок у тунемме ийыште йочасад ден школлаште республикынан кугыжаныш йылмыжым тунемаш куштылгылыкым ышта. Тудын пайдалыкше нерген эсогыл марий илышым шымлыше япон шанчызе Сакурама Акира палемдыш.
Шинчымаш кече вашеш марий тӱвыра рӱдер йоча-влаклан сай пӧлекым ыштен: «Шонанпыл» альбом-чиялтышым савыктен луктын. Чиялтыш марий «чуриян»: икшыве-влак чиялтыме годым олык, курык да эрвел марий-влакын вургем ойыртемышт дене палыме лийыт. Тыгак марий вургемын ойыртемже нерген чиялтышеш вераҥдыме мутер каласкала. Пӧръеҥ да ӱдырамаш мыжер ден тувырым кузе да мо дене ургеныт – умылтарыме. Тыгак марий ӱдырамашын вучиемже-шамыч: шарпан, сорока, шымакш - нерген пален налаш лиеш. Ӱштӧ, йыдал да ончылсакыш нергенат палдарыме.
Альбомышто улшо текстым республикын кугыжаныш - марий да руш -йылме дене пуымо.
Чиялтышым йочасадыште да школышто марий калык тӱвырам туныктымаште кучылташ лиеш.
Савыктышым лукмаште марий тӱвыра рӱдерын директоржо Наталья Пушкинан вуйлатыме почеш сӱретче Марина Тогубицкая, уста полиграфист Юрий Васильев, редактор Раисия Николаева тыршеныт. Альбом-чиялтышым «Стринг» типографийыште 500 экземпляр дене савыктен лукмо.
Визымше проект – марий сылнымутчо-влакын книгаштым, «Ончыко» журналын кодшо курым витлымше ийла гыч таче кече марте лукмо номерже-влакым сканироватлымаш, «цифрыш пыштымаш». Чылаже 600 утла савыктышым Интернетыш вераҥдыме. Аудиокнига, видео- да мультурок-влакым интернет-площадкыште «ВКонтакте» социал кылыште, «Марий тӱвыра рӱдер» тӱшкаште муаш лиеш.