Викиувер: Сайлыме кампанийыште ныл еҥ участвоватла

Республикыштына Марий Элым вуйлатышылан вич кандидат гыч нылытше сайлымаш комиссийыш нуным поддержатлыме шотышто подпись-влакым конденыт.

Регистрацийыш документым Марий Элым вуйлатышын пашажым жаплан шуктышо Юрий Зайцев, пенсионер- влак партийын верысе пӧлкажым вуйлатыше Валентина Злобина, ЛДПР-ын координаторжо Антон Мирбадалев, «Справедлийый Россий - Патриот-влак - Чын верч» партийын верысе пӧлкажым вуйлатыше Наталья Глущенко пуэныт.

Визымше кандидатше - шкем шке темлыше Василий Арисов сайлымаш гыч шке кандидатурыжым кораҥден. Палемдыме жаплан подписьым поген шуктен омыл, - каласен Арисов. Тыге сайлыме кампанийыште ныл еҥ участвоватла: иктыже шкем шке темлен, кумытшым партий-влак темленыт.

«Марий Эл» кугыжаныш теле да радио компанийын сайтыштыже лудаш