|
Сборник деч ончыч ойлымашем-шамыч чылажат жапыштыже газетлаш печатлалтыныт. Но нигӧат ны шере, ны кочо мутым мыланем каласен огыл… Лудшо-шамыч шкеныштын пӱсӧ да шерге мутыштым каласат дыр, шонем.
=== ''' М. Казаков. Торасе вашлиймаш (М. Азмекей лӱмеш) (1941)''' ===
Пеш торасе вереш, йошката пӱнчерлаш,
Мыланнаже пернен, йолташем, вашлияш.
Шонен отыл тыят, шонен омыл мыят…
Ик шомакым муде шогена коктынат.
Куанен шыргыжмаш. Куанен вашлиймаш!..
О таҥем! Курымеш тидым ок лий мондаш.
Шочмо верым ала конденат пеленет?..
Ончылнем тӧрштыл-модын лойгалте Элнет…
Сӱретлалте тунам шочмо сурт гай ола,
Йымыжа Палантайым уэш мый колам.
Пуйто тыштак Какшан… Да таҥем воктенем.
Нигузе ом ӱшане мый таче шканем!..
Шергакан йолташем! Кугу тау тылат!..
Тый шогет ончылнем… Шыматен воштылат…
Тиде годым чонем шочмо верым ужеш,
Шулдыраҥын, шӱмем чот пыртка да шолеш…
''' '''
| 