Беляев, Александр Иванович

Дата рождения: 15.12.1955 Александр Иванович Беляев 1955 ийын 15 декабрьыште Шернур районысо Тамшэҥер ялыште кресаньык ешеш шочын. Торешкӱвар тӱҥалтыш школ деч вара Лажъялыште тунемын, 10 классым Параньга районысо Кугу Пумарийыште пытарен. Школышто тунемме жапыште йолташыж-влак коклаште моткоч чолга рвезе лийын.

Эре художественный само-деятельностьышто участвоватлен, сылнын сўретлашат усталыкым поген шуктен. Кыдалаш школым тунем пытарыме деч вара армийыште служитла, 1974 - 1976 ийлаште Чехословакийыште лиеш. Армий гыч толмеке, музыкальный училищыш мураш тунемаш пура. Тушто республика мучко кумдан палыме педагог Ф.Е.Олейникован классыштыже тунемеш. Училище деч вара кок ий музыкальный театрын хорыштыжо мура. 1984 - 1989 ийлаште шке шинчымашыжым Озаҥ консерваторийыште нӧлта. Александр Беляев бас йӱкан. Кӧ театрыш коштеш, тудо пала: тыгай йӱканже мемнан театрыште кокыт веле - Беляев да Владимир Александров. А чылт мэрий еҥ кокла гыч тымарте - шкетын гына. Мурызын ойлымыж гыч тыге лектеш: тудын ачажат нугыдо да кӱжгӱ йӱкан лийын. Очыни, тиде йӱкшӧ эргыж дек ачаж дечак куснен. Изинек мураш йӧратен, школысо концертлаштат шуко гана мурен. Марий театрыш толмекыже, Александр Беляев «Дорогая Памела» опереттыште врач рольым модын. Тиде рольышто тудлан негр лияш пернен, сандене сценышке эртак шӱргым грим дене шемемден лектын. Турлӧ чиям кучылтман огыл, садлан ик шем гримым шӱрен да йӧрен. Тиде сомылым мый шкетынак ыштылынам, манеш мурызо. Вара «Евгений Онегин», «Кармен» оперыштат мураш ӱшаненыт. Элина Архипован «Алдиар» оперыштыже марий карт Памын рольжым модеш. Дж.Вердин "Риголетто» оперыштыжат мура. Александр Беляев оперлаште мурымо дене гына огеш серлаге, турлє концертлаштат участвоватла. Тудын репертуарыштыже руш муро-влак улыт, но маэрий композитор-влакын мурыштым утларак пагала манашат лиеш. Эрик Сапаевын, Алексей Искандаровын, Иван Егоровын, Юрий Евдокимовын, Вениамин Захаровын возымо муро-влакым куанен, кумыл нєлтын мура. Оперыште мураш келша гынат, марий композитор-влакын мурыштым ончыл верышке шында. Нуным шочмо калыклан пєлеклаш уло мастарлыкшым да вийжым пуаш тырша. Александр Беляев ешан. Пелашыж дене коктын ик ӱдырым ончен куштат.