Изибаев-Бирь, Алексей Русаевич

Исполнитель: Алексей Изибаев-Бирь

Дата рождения: 26.10.1952

Фото:

Информация: Алексей Русаевич Изибаев-Бирь 1952 ийын 26 октябрьыште Пошкырт республикысе Мишкан район, Кемий ялыште шочын. Тусо кыдалаш школым тунем пытарымеке, 1972-1974 ийлаште армийыште служитла. Салтак лийме жапыште вокально-инструментальный ансамбльыште шоктен. А икана мурызын черланымыжлан кӧра тудым солист семын мураш йодыныт. Мурен да чыла шот дене лектын, мурымыжлан моктен ойлымым колын. Тиддеч вара эртак мурымо паша нерген шонаш тӱҥалеш. Армий гыч мӧҥгыш толмеке, тунамак Уфасе искусство училищын вокальный отделенийышкыже тунемаш пура. А тунемын лекмекыже, Пошкырт республикыште кандаш ий ансамбль пелен солист семын мурен коштеш. 1987 ийыште Марий Элышке толеш. Тунам марий эстраде йол ӱмбаке шогалаш гына тӱҥалын. Ондак В.Куприяновын, А.Яшмолкинын, варарак С.Маковын, В.Захаровын да В.Кульшетовын мурыштым радио дене йоҥгалтарен. Варажым Изибаев марий муро-влак дене репертуарым ыштен шуктенат, телевидений денат, посна концертлаштат чӱчкыдын выступатлаш тӱҥалеш. Тудым тӱрлӧ фестиваль ден конкурслашке ӱжыт. Мутлан, 1988 ийыште Озаҥыште Юл да Урал кундемысе композитор-влакын фестивальыштышт участвоватла. Марий республикын артистше семын Москосо сценышкат лектеш. 1990 ийыште Всесоюзный телевидений дене Алексей Изибаев-Бирьын пел шагаташ концертшым ончыктеныт. Тиде ийыштак «Кас» эстрадный группым пога. Гастроль дене Татарстан ден Башкортостан, Казахстан республикла, Свердловск да Тюмень областьла гоч эртеныт. Марий эстрадный искусствышто сай лектышан пашажым шотыш налын, Алексей Русаевич Изибаев-Бирьлан 1990 ийыште Олык Ипай лӱмеш молодёжный премийын лауреатше, 1998 ийыште Марий Эл Республикын сулло артистше лӱмым пуымо