Андрей Андриянов

Исполнитель: Андрей Андриянов

Дата рождения: 24.04.1939

Фото:

Информация: Андрей Андриянов шукертсек драматический театрын артистше улеш. Туге гынат мурымыжо ий мучко да ий еда Марий радио дене йоҥгалтеш. Санденак тудым калык коклаште мурызо семын кумдан палат. Адак мураш йӧрышӧ пеҥгыде йӱкшат уло. Тудын гай йӱкым ученый-влак литературышто баритон маныт. Мурашыжат тудо профессиональный мурызо гаяк мура. Тидлан ӧрман огыл. Шке жапыштыже кок ий лачак тиде пашалан музыкальный училищыште тунемын да профессионально мураш ситышын шуаралт лектын. Андрей Андриянович 1939 ийын 24 апрельыште Башкортостанын Мишкан районысо Кульчубай ялыште шочын. Тӱҥалтыш школым шочмо ялыштыже тунем пытарен. Шымияш школым Тымбайыште, а кыдалаш школым Чорайыште тунем лектын. Школышто тунемме годым визымше класс гычак хорышко да драматический кружокыш кошташ кумылаҥын. Йолташыже-влакын шоктымым колыштын, шкевуя ик радаман тальянка гармоньым шокташ тунемын. А хорышто тудо чӱчкыдын солист семын шкетын мурен. Школыштак моло деч тудо музыканче, мурызо да артист улмыж дене ойыртемалташ тӱҥалын. Умбакыже тиде сомыл-влакым ий гыч ийыш вияҥден толын. Кыдалаш школым тунем пытарымеке, Йошкар-Олашке толеш. Тыште музыкальный училищын вокальный отделенийышкыже тунемаш пура. Училищыште Андрейым консерваторийым тунем пытарыше мурызо Леонид Краснов туныктен. Кокымшо курсым тунем пытарымеке, кыдалаш образованиян самырык еҥ-влакым Москвасе театральный институтыш тунемаш колташ погымо нерген увертарымашым ужеш. Артист лияш йочаж годсек шонен коштшо еҥ тунамак саде группышко пурташ иодмашым серен пуа. Тиде йодмаш почеш Андрияновымат Москвашке колтат. Институтым тунем пытарыме деч вара, 1965-ше ий гыч 1999 ий марте М.Шкетан лӱмеш Марий кугыжаныш театрыште, 1999 ий гыч Марий самырык театрыште модеш, тыгодымак культура да искусство колледжыште туныктышылан ышта. Артист лиймеке, спектакльыште модмо дене гына огеш серлаге, мурымо сомылымат чулымын шуктен толеш: тӱрло концертлаште мура, Марий радион фондшыланат возымашке мураш коштеш. Тудо фонд гыч жапын-жапын Андрияновын мурымыжым коклан кызытат йоҥгалтарат. Тыге Евгений Волковын «Кӧ гын тиде ӱдыр?», «Покто веле, корно сай», Ион Кузьминын «Колызо», «Муро мыскарам мурем», Виктор Газетовын «Гармонист», «Эртем марий Йошкар-Олаште» возымо муро-влакым да молымат ятыр гана колыштмо. А.Андрияновын тӱвыргӧ лектышан пашажым кӱкшын аклен, 1973 ийыште Марий АССР-ын заслуженный артистше, 1989 ийыште Марий АССР-ын калык артистше чап лӱмым пуымо. Культур колледжыштак ыштыше пелашыж дене пырля кок ӱдырым ончен куштеныт.