Ключников-Палантай, Иван Степанович

Палантай Сапан Йыван (Ключников-Палантай Иван Степанович, 1886-1926) — марий семлызе, профессионал марий музыклан негызым пыштыше еҥ.

Иван Степанович Палантай

Илышкорно

Палантай (рушла лӱмжӧ йоҥга - Ключников Иван Степанович) 1886 ий 24 вӱдшорышто Провой кундемысе Какшамарий ялеш шочын. Озаҥ оласе сылнысем училище пеленсе регент-влакым ямдылыше курсым 1909 ийыште да Петербургысо Придворный капелла пеленсе дирижор-влак курсым 1915 ийыште тунем пытарен. Тыгак Моско консерваторийыште тунемын.

1909-1915 Палантай Пермь губернийысе Усолье да Лысва олалаште ила да пашам ышта.

1918 ийыште Чарлаш (Краснококшайскыш) пӧртылеш, учитель семинарийыште мурымашым да музыкым туныкта.

Палантайын Краснококшайск педтехникум пелен чумырымо хоржо 1923 ийыште Совет Российысе хор Олимпиадыште лийын да кӱкшӧ мастарлыкым ончыктен: Пятницкийын хоржо деч вара кокымшо верым сеҥен налын.

1925 ийыште Марий автоном велын 5-ияш лӱмгечыжым пайремлаш чот ямдылалтыныт. Палантай 180 еҥан хорым пайремыште мураш ямдылен.

Айо концерт 1926 ийын 1 ӱярняште эртен, тушто Палантайын пайремлан лӱмын возымо "Йывырте" мурыжо йоҥген.

Палантай шуко оҥай хор произведенийым возен да ятыр марий калык мурым хорлан келыштарен: "Йывырте", "Мурызылан","Куаныме муро", "Кӱсле" да молат.

Чот нелын черланымыжлан кӧра Палантай 1926 ийыште колен.

Кушеч шылтыме лӱмжӧ лектын

Шымлызе-влак кок умылтарымашым пуат. Иван Степановичын йӧратыме туныктышыжо Бобров лийын. А тудыжын кочаже Палантай лӱман лийын. Иван Степанович шке туныктышыжым пагален, шарнен, тудын тукымлӱмжым налын. А весышт Палантай псевдонимым, семлызе кугезе тукымжо дене умылтарат.

Негыз

• "Марий Эл" газет, 26.04.2004, 25.04.2006.