Писте

Писте (лат. Tilia) — яшката тӱҥан, 32 м наре кӱкшытан, мотор, нугыдо парчан лаштыра пушеҥге. Лышташ мучашыже треугольник гай, а ӱлыл ужашыже муныла койшо лопка форман, тӱржӧ пӱян-пӱян. Нарынчалге-ош пеледышыже мӱй пушан. Тудым тыгак лачылык, кӱрлык, нийлык, мочылалык пушеҥге маныт.

Писте пеледыш

Писте Российын Европейский ужашыштыже, Кечывалвел Уралыште (Пошкырт кундемыште), Касвел Сибирьыште, Алтайыште, Тюмень областьын кечывалвелныже, Крымыште, Йӱдвел Кавказыште, Кавказ да Карпат курыкла вес велне кушкеш. Тудо 63-шо параллель деч йӱдвелыштыла ок куш.

Марий Элыште тудо чыла вере вашлиялтеш. Шукыж годым пистым уремым да паркым сӧрастараш шындылыт.

Тӱрлӧ вере илыше марий-влак тиде пушеҥгын лӱмжым тыге ойлат: олык марий (Волжск, Советский) писте; Шернур, Йошкар-Ола, Елабуга (Татарстан), Урал, Малмыж (Киров обл.) пиште; курык марий пистӹ; Яраҥ (Киров обл.), Тоншай, Шараҥге (Нижегород обл.) пиштӹ.