Краснов, Сергей Архипович
Элнет Сергей (С.Эл., С.Элн., С.Красн., К.Э.) (Сергей Архипович Краснов) (1903 сорла 27, Россий империй, Озаҥ губерний, Чарла уезд, Азъял ял — 7 шорыкйол 1938, Марий АССР, Йошкар-Ола ола) — марий серызе, журналист, литератор, мер пашаеҥ.
| Сергей Архипович Краснов | |
|---|---|
| Элнет Сергей (С.Эл., С.Элн., С.Красн., К.Э.) | |
| Шочын | 1903 ий 27 сорла |
| Шочмо вер | Россий империй, Озаҥ губерний, Чарла уезд, Азъял ял |
| Колен | 1938 ий 7 шорыкйол (34 ий) |
| Колымо вер | Марий АССР, Йошкар-Ола ола |
| Тыршымаш алан | журналист, редактор, серызе |
Илыш корныжо
тӧрлаташЭлнет Сергей 1903 ийын сорла тылзын 27-ше кечынже Россий империй Озаҥ губерний Чарла уезд Азъял ялеш кресаньык ешеш шочын. Революций деч ончыч кокклассан школым тунем пытарен. 1919-ше ийыште комсомолыш пурен. 1925-ше ийыште «Йошкар кече» газет редакцийыште пашам ыштен. 1926-1927-ше ийлаште Москвошто Журналистике кугыжаныш институтыште шинчымашым поген, но тудым тунем пытарен огыл. 1929-ше ийыште шачмо ялыштыже «Патыр» лӱман колхозым ыштен, туднн председательже лийын. 1930-ше ийыште тудын вуйлатымыже дене «Колхоз йӱк» район газет лекташ тӱҥалын, редактор сомылымат шкежак шуктен. 1931-ше ийыште «Марий коммуна» газетыш пӧртылын, 1933-1934-ше ийлаште газетын тӱҥ редакторжо лийын. 1935-ше ийыште Сергей Архиповичым Морко медрабфакым вуйлаташ шогалтеныт, 1936-ше ий гыч Шиньша ялыште «Ушнымаш» колхозым вуйлатен.
Сылнымут пашам 1920-ше ийыште тӱҥалын. «Йошкар кече» газетыш ялысе илыш нерген селькор семын шуко очеркым, статьям возен. «У вий», «Арлан ден Кестен» журналлаште тудын ойлымаш да моло произведенийлажым савыктен шогеныт. 1936-ше ийыште серызын «У вий» журналеш «Илымаш шолеш» повесть гыч ужашыже савыкталт лектын. Но повесть возен пытаралтде кодын. 1937-ше ий декабрь тылзыште серызым контрреволюций пашам вӱда манын кучен наҥгаеныт да вес ий январь тылзыште лӱен пуштыныт.
Краснов С.А. Сергей Элнет псевдонимым 1923-ше ий гыч кучылташ тӱҥалын. Южгунамже тудо кӱчыкын С.Эл., С.Элн., С.Красн, К.Э. веле возен. Морко районысо Азъял кыдалаш школ тудын лӱмжым нумалеш.
Тӱҥ произведенийже-влак
тӧрлаташ- Орышо : ойлымаш //У вий . 1929. № 4. С. 34—38.
- Сеҥыш : ойлымаш // У вий. 1929. № 7. С. 19—25.
- Илыш шолеш : повесть//У вий. 1936. № 2. С. 5—35 ; № 3. С. 3—30 ; №4. С. 20-41.
- Илыш шолеш : повесть [Жизнь кипит]. Йошкар-Ола, 1958. 108 с.
Илышыже да творчествыже нерген литератур
тӧрлаташ- Писатели Марийской АССР : биобиблиогр. справ. Йошкар-Ола, 1976. С. 322-323.
- Элнет Сергейын шочмыжлан — ШО ий / сост. В.Крылов. Йошкар-Ола, 2003. 8 с.
- Зайниев Г. Эреак илыш шолмаште лийын // Ончыко. 2003. № 8. С. 9-26.
- Александров Н. Азъял гыч уста мурызо // Марий Эл. 2003. 29 авг.
- МБЭ. Йошкар-Ола, 2007. С. 190.
Кылвер-влак
тӧрлаташ- Элнет Сергей.(руш)