Филологий да журналистике факультет (МарКУ)

Филологий да журналистике факультет (рушла Факультет филологии и журналистики), 2008 ий Сӱрем тылзын 1-ше кечынже шочын. МарКУ-н историй да филологий да МКПИ-н гуманитар факультетше негызеш ышталтын.

Пӧлка-влак

Филологий

Филологий пӧлкам тунем пытарыше-влак "Филолог. Преподаватель" квалификацийым налыт. Курык марий йылме дене специализаций уло. Филолог-влак гуманитар шинчымашын, тӱвыран, йылме-влак кокласе йодыш-влакшым шымлат. Студент-влак йылме-влак, российысе да йотэлысе литератур дене шинчымашым налыт; университетым пытарымек, шанче-шымлымаш да моло пашашкат ушнен кертыт.

Руш йылме да литератур

Руш йылме да литератур пӧлкам тунем пытарыше-влак "Руш йылмым да литературым туныктышо" квалификацийым налыт. "Тӱнямбал да художественный культур", "Руш танле культур"(рушла Русская православная культура) спецализаций-влак улыт. Студент-влак руш йылмым да литературым туныкташ ямдылалтыт. Тиде пӧлкаште психологий, педагогик, у йӧн-влакым кучылтын урокым эртарымылан туныктат.

Журналистик

Журналистике пӧлкам тунем пытарыше-влак "Журналист" квалификацийым налыт. "Периодическая печать" да "Радиовещаний" специализаций-влак улыт. "Журналист" квалификацийым налше-влак газет, журнал, радио да телевидений пашам, пашан эртымгорныжым шымлат, увер-влакым погымо, ямдылыме да савыктыме нерген келге шинчымашым налыт.

Кафедр-влак

Кызыт филологий да журналистике

факультетыште кум кафедр уло:

руш да йот элысе литератур (рушла русской и зарубежной литературы) (профессор Татьяна Аркадьевна Золотова вуйлата),
руш да чумыр йылмешинчымаш (рушла русского и общего языкознания) (Георгий Николаевич Валитов вуйлата),
журналистик (Олег Николаевич Тихонов вуйлата).

Кафедрылаште литератур, руш йылме, руш йылмым туныктымо методике, журналистик дене аспирантур-влак пашам ыштат. Тыгак, факультетыште "Журналистик", "Руш йылме да литератур" пӧлкалаште заочно туныктат. Шанче лӱм да степеньым налше еҥ-влакын чотышт - 90%, нунын коклаште шанче доктор, профессор-влак - 20%.

Клуб да ушем-влак

Эше историк-филологий факультетыштак чоҥалтше да пагалымашым сулышо "Логос" клуб у факультет пелен пашам ышта. Негызым пыштыше да вуйлатыше - Сергей Александрович Журавлев. Клуб погынымашыш толшо-влак ончылгоч палемдыме теме шотышто кутырат, каҥашат. Клуб тыглай конференцийла деч ойыртемалтеш. Эн чӱчкыдын кастене эрта. Ойырымо аудиторийыште электротулым йӧрыктат, сорта-влакым ылыжтат, южгунам чайым йӱыт. Кутырымаш руш йылме дене эрта, актуальный, чотым тургыжландарыше теме-влакым авалта. Каҥашымашлашке студент-влак гына огыл, туныктышо, политик, шанчызе, кумдан палыме еҥ-влак толедат.
"Сократ" клуб шке йырже политик дек шӱмаҥше-влакым чумыра. Чоҥышо да вуйлатыше - Евгений Валерьянович Суслов.

Тыгак ончо

Марий кугыжаныш университет