Хоккей

Хокке́й (англ. hockey) — команде дене таҥасыме спорт тӱрлык. Модшо-влак кидыште клюшкым кучен, тавалышын капкашкыже мечым але шайбым пурташ тыршат. Кажне командыште шке капкам аралыше капкаорол уло.

Хоккей радамыш кызыт икмыняр модмаш пура:

• Шайбан хоккей - резине гыч ыштыме (168 грамм нелытан) диск дене ий валне эртыше модмаш. Резине дискым шайбе маныт. Тиде эн чот шарлыше хокке тӱрлык, сандене "Шайбан" мут деч посна тудым лӱмдат - хоккей. Шочмо верланже Канаде шотлалтеш. Канадыште, Российыште, УАШышто, Скандинавий велне, Чехий, Словакий, Немыч Эл, Швейцарий, Украине, Беларусь, Казахстан кундемлаште чот шарлен.

• Инлайн-хоккей — шайбан хоккей гае модмаш, но роликан коньким чиен дене модыт.

• Ӱстембал хоккей

• Шудо хоккей — олыкышто, але шудан верыште, пеҥгыде изи мече дене модыт. Австралий, Индий, Пакистан, Малайзийыште чот шарлен.

• Индорхоккей — шудо хоккей гае, но гандболлан келыштарыме спортзалыште эрта.

• Руш хоккей --- пеҥгыде изи мече дене ий валне модыт. Россий, Швеций, Финляндий, Норвегийыште чот шарлен.

• Флорбол — пластмассе гыч ыштыме клюшко да пуста мече дене залыште модыт.