Аламнер

Аламнер — Курыкмарий кундемыште верланыше курык. Курыкмарий кундемысе Кузнецово ял деч 2 меҥге тораште верланен. Чыкма ола деч 20 меҥге, Шовакшэҥер ола деч 50 , Йошкар-Ола деч 130, Моско ола деч 650 меҥге тораште верланен. Аламнер курык тураште Юл эҥерын лопкытшо 2 меҥгыш шуеш. Курык воктен моткоч тӧр, лопка вер уло , кудыжо курык деч Изи Шундыр эҥер дене ойыралтеш.

Ӱмбал
Аламнер
Аламнер курыкын моторлыкшо Аламнер курыкын моторлыкшо

Эртымгорно

XI- XV курымлаште Аламнер курык ӱмбалне илем-влак лийыныт, а вара марий карман Салым-Ола лийын, кудыжо руш онлык влак дене ужалыме - налме вашкылым пеҥгыдемдаш полшен. Аламнер курыкын историйже Шундыр-Ола дене кылдалтын . Шундыр-Ола Юл эҥерын пурла серыштыже верланен. Шовакшэҥер да Озаҥ ола-влак коклаште. Ожно тиде илем марий он Аказын онлыкышкыже пурен. Ожнысек тиде марий ял лийын, вара руш-шамычат илаш тӱҥалыныт. Курымсерыш материалым ончал лекмеке пален налаш лиеш: XVI курым кыдалне тышке Иван Грозныйын еҥже-влак илаш толаш тӱҥалыныт . Нуно шке ял шотан илемым чоҥеныт да рушла Сундырь манын лӱмденыт. Шундыр-Ола нерген икымше гана 1620 ийыште палемден коденыт. Шундыр-Ола Шундыр эҥерлан кӧра тыгай лӱмым налын. Чуваший республикын кумдыкыштыжо 2 кресаньык сар гӱжлен. Емельян Пугачев да Степан Разинын вуйлатымыж почеш. Степан Разинын сарзе вийже Аламнер курыкышто верланыше ял шотан илем марте шуын огыл, а теве Пугачевын сарзе вийже Нерядово ял воктене 1774 ийыште лийын. Тиде ял Юлын пурла серешыже верланен, Шундыр-Ола деч 3-5 меҥге тораште .

Кызытсе жап

Алмнер курык кокла курым тӱвырам почын ончыктышо фестиваль-влак дене чапланен. Арам огыл фестивальын организаторжо-влак тидым верым ойырен налыныт. Лачак тыште XV курым годсо карманын пырдыжше-влак кодыныт. Фестиваль кокла курым пагытын шӱлышым пуртен шога: вургем сарӱзгар - чыла коклакурым пагыт дене шула. Марий эл республикын тӱвыра да сымыкытыш министерствын кышкарже почеш лишыл жапыште Аламнер курыкышто тоштер-заповедникым почаш шонымаш уло.

Кылвер-влак

• wanders-k.ru- "Команда Кочующих"