Зарецких, Анатолий Алексеевич

Анатолий Зарецких (Анатолий Алексеевич Зарецких) (1958 пургыж 1, Киров вел, Кӱльмӱж кундем, Таут ял) — марий мурызо, Марий Эл Республикын сулло артистше.

Анатолий Алексеевич Зарецких
Анатолий Зарецких
Шочын	1958 ий 1 пургыж(1958-02-01) (66 ий)
Шочмо вер	Киров вел, Кӱльмӱж кундем, Таут ял
Чап пӧлек да премий	Марий Эл Республикын сулло артистше

Ӱмыргорно

Анатолий Зарецких 1958 ийын пургыж тылзын 1-ше кечынже Киров вел Кӱльмӱж кундем Таут ялеш шочын. Ешыште 7 икышве лийын, Анатолий эн изи лийын. 9 классым тунем пытарымеке, тӱвыра корным ойырен. Киров олсе тӱвыра училищыш тунемаш пурен. Тушко ик гана «Марий Эл» ансамбльын художественный вуйлатышыже Михаил Мурашко толын. Чолга марий ӱдыр-рвезе-влакым ансамбльыш ойырен. Тунам Анатолий лӱмлӧ балетмейстер дене палыме лийын. Пел ий гыч, училищым тунем лекмеке, Анатолий Зарецких Йошкар-Олашке толын. Кугыжаныш ансамбльыш тудым вигак налыныт. Ансамбль дене пырля ятыр кундемыш гастроль дене миен: Чехословакий, Камбоджа, Греций, Германий, Франций да т.м. Марий Эл ансамбльыште Анатолий Зарецких 1981 гыч 2001 ий марте тыршен. Вара тӱвыра да сымыктыш колледж пеленысе «Аршаш» ансамбльыште мурызо семын семын мастарлыкшым шуарен.

Марий Элыште гына огыл, Киров, Пошкырт, Татарстан кундемлаштат Анатолий Зарецкихын лӱмжӧ сайын палыме, да тидын шотышто артист ик оҥайым газетлан интервьюшто каласен:

Кеҥежым Марий-Турек кундемыште концерт палемдалтын ыле. Кече пеш шокшо. Мый шкенан машина дене корныш тарванышым. Ондак У Торъял кундемыш оньыкува деке пурышым. А вара Шернурышкыла тарванышым. Остановкышто кок ӱдырамаш шога. Шындышым. Шкеже бейсболкым упшал шинчынам, садлан чуриемже сайын нунылан огеш кой. Марий ӱдырамаш-шамыч тыгай улыт вет: палымышт улат але уке — пеш мутланат. «Тый шкеже кушеч улат гын?» — йодеш мый дечем иктыже. «Виче кундем гыч улам», — маньым. Умбакыже кудалына. Оҥайынак чучо. «Анатолий Зарецкихын лӱмжым колында мо»? — йодам. «О, колынна, колынна, — маныт. — «Чолга шўдыр» фестивальыште мураш лектын ыле. И мура, и кушта!» «Вот… А ме тудын дене ик ял гыч улына», — мыскара йӧре пелештышым, шкеже шыргыжалынак колтышым. А нуно мыйым пален шуктенат огытыл.

Еш

Анатолий Зарецких пелашан улеш, Роза Анатольевна У Торъял кундемысе Кузнеч ял гыч. Анатолий дене когыньыштын кум икшывышт уло.