Акцорин, Виталий Александрович

Акцорин Виталий Александрович — филологий шанче кандидат (1968), кугурак шанче пашаеҥ (1970), Венгр Науко академийын суапле еҥже (1985), Марий республикысе наукын сулло деятельже (1990).

Илыш корныжо

В.А. Акцорин 1930 ий 17 июньышто тунамсе Марий АССР-ысе Йоласал район Берёзово-Шимбатрово ялеш шочын. Микрӓк кыдалаш школым пытарымек (1949—1953), Н.К. Крупская лӱмеш Марий кугыжаныш педагогике институтын литератур факультетышкыже тунемаш пурен. Институтым пытарымек, Йоласал кыдалаш школышто марий йылмым да литературым туныктышылан (1953—1956), просвещений министерствыште шочмо йылме да литератур шотышто инспектор-методистлан (1956—1958) ыштен. 1958 гыч 1998 ий марте В.М. Васильев лӱмеш Марий научно шымлыше институтышто изирак шанче пашаеҥ, кугурак шанче пашаеҥ, фольклор секторым вуйлатышылан ыштен. 1961—1964 ийлаште СССР Науко академийын А.М. Горький лӱмеш Тӱнямбал литератур институт пеленсе аспирантурыштыжо тунемын. 1968 ийыште «Марий калык драме да марий драматургийын шочмаштыже да йолӱмбак шогалмаштыже тудын рольжо» теме дене кандидатлык диссертацийым арален.

Тӱнямбал, всесоюзный, Россий кӱкшытысӧ конференцийлаште, конгресслаште, симпозиумлаште мутым ойлен, нунын коклаште — Киевыште (1964), Таллинныште (1970), Будапештыште (1975) да моло вере.

1972—1975 ийлаште Марий кугыжаныш университетыште руш фольклор, акрет руш литератур дене, 1976 ий гыч марий фольклор дене лекцийым лудын.

Чумыржо 51,5 п.л. кугытан 100 утла статьям да аклыме ойым савыктен.

Награде да чаплӱмжӧ: Марий КПСС обкомын да Марий АССР Министр-влак советын Чап грамотышт дене палемдалтын (1980).

1998 ий 7 мартыште колен.

Литератур

1. Марийские литературоведы и фольклористы: биобиблиографический сборник / Мар. гос, ун-т; сост. В.Н. Максимов. Йошкар-Ола, 2018. C. 13—17