Тӱлымаш терминал

Тӱлымаш терминал (рушла Платёжный терминал) — электрон программе почеш пашам ыштыше аппарат, еҥ-влак деч тӱлымӧ оксам налеш. Тӱлымаш терминал шуко пашам шке, оператор деч посна ыштен кертеш. Терминал-влакын пашаштым Интернет гоч эскераш лиеш.

Пачерлан тӱлымӧ терминал

Тӱлымаш терминал-влак тыгай тӱрлыклан пайлалтыт:

• Пӧрт кӧргысӧ терминал (кӱварыште, пырдыжыште, пырдыж кӧргыштӧ, ӱстембалне вераҥдаш лиеш).
• Уремысе терминал (пырдыжыште, пырдыж кӧргышкӧ вераҥдат, посна шогалташ лиеш).

Молан кӱлеш

Тӱлымаш терминал гоч:

• кӱсен кутырчыклан, пачерлан, Интернетлан, банк кредитлан тӱлымаш пашам шуктат;
• тӱлымаш системыште шке окса шапашым кугемдаш, банк картыш оксам пышташ лиеш.

Пашам ыштыме радам

Кызыт эн чӱчкыдын сенсор экранан терминал-влак вашлиялтыт. Айдеме экран меню гоч тӱлымӧ верым ойыра, кӱлеш реквизит-влакым палемда (телефон номер, лицевой счет номер, да т.м.). Экраныште лекше инструкций почеш чыла ыштымеке, оксам пуртымо рожыш кӱлеш оксам колта да "Тӱлаш" (рушла "Оплатить") паҥгам темдалеш. Терминал чын-шоя оксам да тудын кугытшым шке пален налеш. GPRS-модем але иктаж могай вес кыл гоч терминал пуртымо данныйым тӱлымаш системын серверышкыже колта, тушто чыла данный-влакым шотыш кондат. Тиддеч вара терминалыш колтымо окса айдемын счётышкыж толеш, терминал тидын нерген чекым луктеш. Южгунам тиде паша радам ойыртемалт кертеш. Мутлан, южо терминал-влак реквизитым пуртымо форматшым гына терга (чын але уке возымо), а окса толын але уке - огеш эскере. Тыге йоҥылыш возымо реквизитлан терминал оксам налеш, но окса айдемын счетышкыж толын ок шу. Тӧрлаташлан терминал оза компанийын техник полыш службыш йыҥгыртыман. Терминал дене пайдаланымашлан терминал оза пайдаланыше-влак деч оксам налын кертеш. Эн чӱчкыдын тиде пуртымо окса деч изи процент, але оксам налше организаций деч комиссий.