Умурбаева, Татьяна Витальевна
Татьяна Умурбаева (Татьяна Витальевна Умурбаева) (1974 сорла 26, Пошкырт Эл, Илиш кундем, Алач ял) — марий мурызо.
| Татьяна Умурбаева | |
|---|---|
| Умурбаева Татьяна Витальевна | |
| Шочын | 1974 ий 26 сорла (50 ий) |
| Шочмо вер | СССР, РСФСР, Пошкырт Эл, Илиш кундем, Алач ял |
| Сайт | ВКонтакте сайтыште |
Илыш корныжо
тӧрлаташТатьяна Умурбаева 1974 ийын 26 августышто Пошкырт Элысе Илиш кундемын Алач ялыште шочын. Верысе школышто кандаш классым тунем пытарен. Вара Октябрьский оласе музыкальный училищын хорово-дирижерский отделенийыштыже тунемын. Училище деч вара шкеныштын ялысе школышто пений предмет дене туныктышылан ыштен. Тыгодымак самодеятельностьышто чÿчкыдын выступатлен.
Пошкырт Элыште илымыжлан кӧра концертлаште утларакшым татарла мурашыже логалын. Икана Станислав Шакировын мурыжо-влакым возымо кассетым колыштынат, тунамак Марий Элышке толаш кумылаҥын. Изиш лиймеке, шонымыжым шукташ амал лектын. Йошкар-Олаште «Ший памаш» (1995 ий) республиканский конкурс лийшашым колын.
Школышто икмыняр кечылан отпускым налынат, Йошкар-Олашке толын. Тыште тудо тунамак вес йогыныш логалын. Марий филармоний пелен «Мари» ансамбльым вуйлатыше Валерий Кульшетов тудым пашаш налаш йодмашым возыктен. Тыге Пошкырт кундем гыч конкурсышто участвоватлаш шонен толшо самырык мурызо у коллективыш логалеш. Тушто трио дене мурымашке ушна, шкетынат мура. Южо мурыжым Марий телевиденийланат возымо. Нунын коклаште — В. Кульшетовын «Сÿремда курык», В. Захаровын «Шÿм» да В. Регеж-Гороховын «Суомиш серыш» почеламутшылан шке возымо мурыжо. Семым келыштарыме пашам икымше гана ыштен гынат, уда лийын огыл. Шкемын возымо муремже лу наре уло, манеш.