Режиссёр

Режиссёр (французла régisseur — «заведующий», лат. rego — «виктарем» деч) — спектакльым, киносӱретым, радиопередачым да монь ямдылыше еҥ, сымыктыш пашаеҥ, театр, кинематограф, телевидений, цирк, эстрадыште тыршен кертеш.

Режиссёр пашам ыштымыж годым (Сесиль де Милль)

Икымше гана Российыште «режиссёр» мутым В. И. Даль шке мутерыштыже умылтара: «Актер-влакым вуйлатыше, модмашым, представленийым виктарыше, мом пуаш, мом шындаш ойырышо, роль-влакым пуедыше». Режиссёр паша театр пелен шочын. Вара XX курым тӱҥалтыште режиссуро киношко куснен. Тидлан шке вийыштым шуко пыштеныт: Чарли Чаплин, Д. У. Гриффит, Г. В. Пабст.

Южгунам спектакль але кинофильмым ик режиссёр веле огыл шында. Тидын годым тӱҥ режиссёр (чыла пашам вуйлатыше да виктарыше) «режиссёр-постановщик» лӱмдалтеш, тудын лишыл творческий полышкалышыже — «режиссёр» лиеш. Изирак пашам «режиссёр-ассистент» але «режиссёрын ассистентше» шукта.

Кажне сымыктыш пашаште режиссёр тӱҥ пашам ок шукто, мутлан, балетыште тӱҥ пашам балетмейстер ышта.

Режиссёр паша Марий Элыште

Марий кинематограф але ты жаплан кугу вийым поген шуктен огыл. Туге гынат, марий режиссёр-влак ятырын улыт. Тидлан шуко театр улмо полша. Икымше ошкылым режиссёр пашалан тунеммашыште Марий Элыште Тӱвыра да сымыктыш колледж полшен кертеш. Тушто театр режиссёрлан туныктат. Марий Элысе театрлаште тыршыше режиссёр-влак тӱҥ шотышто чылан Россий кӱкшытан театр сымыктышлан тунемме верлаште шинчымашым погеныт.

Марий режиссёр-влак

• Василий Домрачев — кино, театр режиссёр. «Салика» телеспектакльым шынден.
• Олег Иркабаев-Этайн — кино, театр режиссёр. «Ял ӱмбалне мужыр йӱксӧ» фильмын режиссёр-постановщикше.
• Алексей Маюк-Егоров — икымше марий профессионал режиссёр.
• Василий Пектеев — театр режиссёр.
• Наташа Пушкина — эстраде режиссёр.
• Алексей Ямаев — театр, эстраде режиссёр.
• Кириллова, Сарра Степановна — Шкетан театрын тӱҥ режиссёржо (1974-1987 ийлаште).
• Кудрявцев, Валентин Андреевич — ГТРК «Марий Эл»ын тӱҥ режиссёржо (1990 ий гыч).
• Сусанин, Борис Васильевич — марий телевиденийын икымше режиссёржо.