20 ага

20 ага (20 май) — григориан кечышот почеш идалыкын 140-ше (кужемдыме ийлаште — 141-ше) кечыже. Идалык пытыме марте 225 кече кодеш.

Пайрем да памятный дате-влак

• Метрологын тӱнямбалсе кечыже. Тиде кечын 1875-ше ийыште Парижыште эртыше конференцийыште метрологын кечыжым пайремлаш палемденыт. ЮНЕСКОн пунчалже почеш, 2001-ше ий 20 Ага гыч тӱнямбалсе кече семын палемдалтеш.
• Россий, Юл эҥерын кечыжым палемдат.
• Эрвел Тимор, Эрык кече.
• Индонезий, Кугыжаныш помыжалтмаш кече.
• Камерун, Унитарный кугыжанышым ыштыме кече.
• Сауд Аравий, Эрык кече.
• Украина, Банк пашаеҥ-влакын кечышт.

Лӱмгече

• Танле (православный) лӱм-влак: Антон, Иван, Михаил, Степан.
• Католик лӱм-влак: Бернард, Василий.

Событий-влак

Тугак ончо: Категорий:Ага тылзын 20 кечысе событий-влак

• 1742 ий — штурман Семён Челюскин Евразий континентын эн йӱдвел ужашышкыже миен шуын. Тудо вер кызытат Челюскинын мысше лӱмым нумалеш.
• 1873 ий — джинс йолаш-влакым ышташ тӱҥалыныт.
• 1942 ий — Отечественный сарын 1-ше да 2-шо степенян орденжым пеҥгыдемдыме.

Шочыныт

Тугак ончо: Категорий:Ага тылзын 20 кечынже шочшо-влак

• 1947 ий — Николай Николаевич Николаев, шанче физик. Москосо кугыжаныш университетым тунем лекмек, Ландау лӱмеш физик институтышто тыршаш тӱҥалын. Тӱҥ шотышто шанчыеҥ атом физикым шымлен: 300 наре шанче пашам возен. Физик да математик шанче доктор.
• 1957 ий — Игорь Константинович Фоминых, ял озанлык вуйлатыше, Марий Эл Республикысе ял озанлыкын сулло пашаеҥже. Уста пашаче шочмо районысо «Куженерский» совхозышто ойырен налме профессийже дене шуаралтын: инженер-механик гыч тӱҥалын, вуйлатыше марте шуын. 8 ий республикысе кугыжаныш погынын депутатше лийын.
• 1965 ий — Игорь Николаевич Кудряшов, тӱҥ шотышто тудо бизнес пашаште шуаралтын, но мер пашаштат кугу пагалымашым сулен. Шкеже Морко кундем Ерсола гыч. Морко район Ердӱр ял пайремым эртарымаште тудынат надырже моткоч кугу.
• 1971 ий — Сергей Михайлович Чечётко, театр пашаеҥ. Шкеже Саратов вел Татищево ола гыч. Ынде ятыр ий тудо «Геликон Опера» Москосо музык театрын концертмейстержылан пашам ышта.
• 1983 ий — Ирина Владиславовна Трубянова, марий йылмызе, шанчызе, туныктышо, филологий шанче кандидат (2010).

Коленыт

Тугак ончо: Категорий:Ага тылзын 20 кечынже колышо-влак

• 1977 — Зиновий Краснов (Зиновий Андреевич Краснов), марий серызе, почеламутчо, журналист.

Калык пале

• Тиде кечын ожно кечыште ырыктыме эҥер вӱд дене мушкылтыныт: тидлан эрдене эрак ведраш вӱдым кошталын шынденыт, а кечывалым чывылгеныт. Тыгак эҥерыш имньым йӱштылаш пуртеныт. Тыге имне вий-куатым пога, маныныт.
• Марий калык имньылан посна тӱткышым ойыра. Ик шотшо дене тудо кызытат шнуй вольыклан шотлалтеш. Имньым ончен, кугезына-влак игечым мужедыныт: имне шудышто пӧрдалеш — игече вашталтеш, чытырнен але пошырнен колта гын — кугу йӱрлан.

	20 ага Викиклатыште?